Kabul-a thihchilh bomb puakah mi pali an thi

Afghanistan khawpui, Kabul-ah nimin khan thihchilh bomb a puak a, mi pali an thi a, mi dang 23 in hliam an tuar.

Military official chuan thihchilh bomb puahna hmun hi Macroyan biala-a Shash Darak road, National Defence Security (NDS) checkpoint awmna bul a nih thu a sawi.

Health ministry thupuangtu Wahid Majrouh chuan hliam tuarte hi Wazir Akbar Khan hospital leh Emergency Hospital-ah hruai an ni a, an zinga ṭhenkhat chu an dinhmun a ṭha hlo hle a, thi zat pawh hi a la punchhoh a rin thu a sawi.

Mita hmutute chuan thihchilh bomb paite hian NDS bula Nato convoy chu an bitum niin an sawi a, bomb puak vang hian motor tam tak a chhe tel bawk a ni.

Kabul-a pawikhawihna thleng hi eng pawl mahin an tih niin an la chhal lo. Hetih lai hian Taliban fifiakte chuan an rama ramdang sipai awmte dap chhuak a, beihpui an thlak tur thu an lo sawi tawh a ni.

Afghanistan-ah sipai tam zawk dah belh mamawh a nih thu US general John Nicholson chuan a lo sawi tawh a ni. Pentagon chuan kumin nipui chhungin Hemland province-ah sipai 300 dahbelh a nih tur thu a lo sawi tawh bawk.

US sipai dah belh turte hi NATO kaihhruaia ṭangrual ramten Afghanistan sipaite training an pek kawngah an pui dawn a ni.