Nigeria President chawlh la turin nawr

Nigeria President Muhammadu Buhari, kum 74 mi chu a hriselna dinhmun a ṭhat tawk loh avangin medical leave la mai turin mi ṭhenkhatin an ngen.

President hian cabint meeting ṭum hnih a telpui peih tawh lo nia sawi a ni.

Buhari hian kumin January thla tir khan medical leave lain UK-ah inenkawl turin a kal a, March thla khan an ramah kirin a hna a thawh chhunzawm leh a ni. Buhari hian a na hle niin a sawi a, mahse a natna erawh a sawilang lo.

Nigeria rama mi zahawm tam tak awmna pawl pakhat chuan thuchhuah siamin, President chu kar kalta chhunga mipui hmuhah a inlan lo te, cabinet meeting ṭum hnih a telpui lote leh Zirtawpni-a Muslim ṭawngṭaina huna a inlan thei lote chuan a hriselna dinhmun chungchangah thu lengvak a tihtam phah hle niin an sawi.

He pawl member-ah hian lawyer lar Femi Falana, political analyst Jibrin Ibrahim leh Transparency International Nigeria head Anwal Musa Rafsanjani-te pawh an tel. An pawl hian President Buhari chu a personal doctor-te thurawn ngaihthla a, medical leave la mai tura an duh thu an sawi a ni.