UK PM laka lungawi lo minister bang an pun belh zel

UK prime minister Boris Johnson-a'n ram a kaihhruai dana lungawi loin, a cabinet minister pahnih chu Thawhlehni khan an bang a, nimin khan minister dang pahnih an bang ve leh bawk.

British health secretary Sajid Javid leh chancellor of the exchequer Rishi Sunak-te chuan Thawhlehni khan Prime Minister Boris Johnson-an ram a kaihhruai danah lungawi loin Conservative sorkar an chhuahsan thu an puang. Javid chuan "He sorkar tan hian lungawi takin kan thawk zui thei tawh lo a ni," tiin Sunak pawhin sorkar inrelbawldan chu a sawisel zui.

Javid chuan PM Johnson-a kaihhruaina hnuaiah an ram dinhmun hi a inthlak danglam dawn lo a, hei vang hian ram hruaitu atan chuan a ring zo tawh lo tih a sawi. Rishi Sunak pawhin a banna thehluhah hian mipuite chuan inrelbawlna mumal tak, rintlak leh tih tak zeta ram tana thawk sorkar an beisei tih a sawi. "Ram kaihhruai hna ka chelh hnuhnung ber a ni mahna, mahse heng dinhmunte hi theihtawp chhuaha thawh tur nia ka hriat avangin ka bang ta a ni," tiin chancellor Sunak chuan a sawi a ni.

Nimin khan minister for children and families Will Quince leh junior transport minister Laura Trott-te pawhin Johnson kaihruai sorkar chu an ring zo tawh lo tih sawiin, minister an nihna aṭangin an bang ve leh bawk.

Johnson leh a kaihhruai sorkar hian sawisel a hlawh chho leh a, hei vang hian kum 2024-a inthlanpui neih leh turah Conservative dinhmun hi a ṭhat tawk loh rinna a lian chho hle. Johnson hian Covid-19 lockdown an neih laiin Downing Street-ah party an lo huaihawt chungchang, Partygate tiha an vuahsak chungchangah Parliament-ah fiahna a tawh phah a, mahse he fiahna hi a paltlang thei a ni.

Hei bakah tun hnaia Johnson-a'n sawisel a hlawh chhoh lehna chu deputy chief whip atana mipat hmeichhiat lama a chetdan avanga sawisel lo tawk tawh, Chrisitopher Pincher a ruat chungchangah a ni. Johnson hian cabinet minister pahnihin an ban thu an puan hma lawk hian TV-ah Pincher ruat a nih avang hian ngaihdam dilna a tichhuak a ni.