UN hotu in UNMISS commander thar a ruat

UN secretary-general Antonio Guterres chuan Thawhlehni khan United Nations Mission in South Sudan (UNMISS) force commander thar atan India mi Lieutenant General Mohan Subramanian chu a ruat.

Subramanian hian India mi vek Lieutenant General Shailesh Tinaikar chu a thlak a ni. Guterres chuan Lt Gen Tinaikar chu UNMISS force commander a nih chhunga a inpekna, thawhrimna leh hruaitu ṭha tak a nih avangin a chungah lawmthu a sawi bawk.

UMISS force commander thar, Subramanian hian sipai a ṭan chhungin a hming ṭha hle a, Indian Army-ah kum 36 chhung a thawk tawh a ni. Kum 2000 khan Sierra Leone-ah UN peacekeeping mission hnuaiah a thawk tawh a ni.

Kum 2011-a din UNMISS hian thawktu 17,982 kawl mekin, an zinga 13,254 te chu sipai an ni. UN peacekeeping operation 13 kalpui mek zingah sipai an ngah ber a ni. India chuan UNMISS-ah hian sipai 2,385 leh police 30-an thawh mek bawk.