China-a Xian khawpuiah lockdown puang leh

China-a Shaanxi province hmarthlang lama Xian khawpuiah Covid-19 hri inkaichhawn awl tak, Omicron BA.5 chu khawtlangah a darh tih hriatchhuah a nih hnuah nimin aṭang khan khawpuiah hian lockdown puan nghal a ni.

Xian municipal sorkar chuan ni thum liam ta chhunga hri kai natna langchhuak leh langchhuak lo mi ṭhahnem tak an hmuhchhuah avangin kar khat awh lockdown hi a puang a ni. Vantlang punkhawmna hmun -school, restaurant, gym, cultural activity venue leh bazar-te chu nimin aṭang khan khartir an ni. In-house dining chu khap a ni a, take-away erawh phalsak an nih thu thuneitute chuan an sawi. Tan in, welfare home leh tar enkawlna hmunte pawh khar tel an ni vek ang.

Sorkarin Covid laka an fihlim theihna tura kaihhruaina a siamte khauh taka kenkawh a ni a, khawpuia cheng mipuite pawh tun kar chho aṭangin a khat tawkin mass test nei tura beisei a ni.

Shaanxi-a Centre for Disease Control and Prevention, infectious diseases specialist Zhang Yi chuan Xian khawpuia hri a darh lehna chhan ber chu Omicron BA.5 strain vang niin a sawi a, "Omicron BA.5 subvariant hi BA2.2 sublineage hmasa te aiin inkaichhawn a awl zawk bakah a darh chak zawk a ni. Vaccine hnathawh pumpelh theihna a nei bawk a ni," a ti.

BA.4 leh BA.5 strain-tehi kumin kumtir khan South Africa-ah hmuhchhuah ṭan an ni a, US leh ram ṭhahnem taka hri kai pun chak chhanah an ngai a ni

Terracotta Army historical site tia hriat lar, Xian khawpuiah hian nikum kumtawp lam aṭang khan hri leng vangin inkharkhipna khauh tak kalpui a lo ni tawh a, kumin April khan hri kai an pun leh vangin partial lockdown puan a lo ni leh bawk.