Wuhan-a nau piang hlimin coronavirus kai

Novel coronavirus hmuh­chhuah ṭanna, China-a Wuhan khuaah February 2 khan nau piang hlimin coronavirus a kai tih hmuhchhuah a nih thu tualchhung chanchinthar thehdarhtute chuan an tarlang.  

He naupiang hi a pian aṭanga darkar 30 hnuah virus hi a kai tih hriat chhuah a ni a,a nu hian coro­navirus a kai bawk a ni. Doctor-te chuan he natna hrik hi engtin nge naute hian a kai theih tih chiang takin hre lo mah se, nau a pian hnua a nu nen an inhnimhnaihna aṭanga kai niin an sawi.  

Nausen hi kg 3.25 a rit a ni a, Wuhan Children's Hospital-ah uluk tak enkawlna pek mek a ni. He naupiang bakah hian Singapore-a nausen thla 6 mi pawhin a kai thu tarlan a ni bawk. Anni bakah hian, Wuhan aṭanga zin Australia-a khawsa mek kum 8 miin a kai tih hriatchhuah a ni bawk. Journal of the American Medical Association (JAMA)-te chuan kum 49 aṭanga 56 inkarin he natna hri leng hi an kai hnem ber thu an tarlang thung.

Coronavirus vang hian mi 563 an thih tawh thu tarlan a ni a, mi 28,018-in he natna hi an kai tih hriatchhuah tawh a ni. 

Ram hrang hrang 25-ah he natna hri hi a ṭaidarh mek niin chanchinthar thehdarhtute chuan an tarlang bawk.