Venezuela khawpuiah buaina chhuak

Venezuela khawpui, Caracas-ah President Nicolas Maduro-a'n ram danpui siam thar a tum duh lohna lantirin kawngzawh huaihawt a ni a, kawngzawhte leh police-te inkarah buaina nasa tak a chhuak zui a ni.

Nilaini-a kawngzawhte hnawh­darh nan hian police-te chuan tear gas, rubber bullet leh water cannon te an hmang a, mipui pungkhawmte chuan petrol bomb an tipuak ve bawk. Buaina chhuak vang hian mi pakhat a thi nia sawi a ni.

Eptute hian President-in ram danpui siam thar a tum hi duh loin, president a nihna aṭanga bang turin an phut a, inthlanṭhat an phut bawk. An thil phut hi tihhlawhtlin a nih hma chuan nawrh chhunzawm zel an tum tih an sawi.

Maduro chuan ram danpui thar duangtu tur, member 500 awmna constituent assembly ruat an ni dawn a, member-te hi section hrang hrang aṭangin an thlang dawn tih a sawi.

President Maduro thiltih dan hi sawiseltu eng emaw zat awm mah se, Cuba leh Bolivia-te chuan an thlawp thung. Bolivia President Evo Morales chuan Venezuela chuan ram dangte inrawlh loa a ram hmalam hun tur siamfel turin dikna a nei a ni, a ti.

April thla tir aṭang khan Vene­zuela eptute chuan President Maduro paihthlak phutin nawrh an huaihawt tawh a, tualchhung buaina chhuak vang hian mi 30 chuang an thi tawh a, mi 400 chuangin hliam tuarin mi 1,000 vel man an ni tawh bawk.