Iran coal mine-a thil puakah mi 35 an thi
Iran hmarchhak lam, Golestan province-a lungalhthei laihchhuahna khura thil puakah mi 35 an thi a, midang tam takin hliam an tuar.
Chhiatna thlenna hmun hi Azadshahr khua aṭanga km 14 vela hla, Zemestanyurt mine a ni.
Minister of Cooperative, Labore and Social Welfare Ali Rabiei chuan khura thil a puah lai hian khur chhunga hnathawktu awm zinga mi 35 an thih thu a sawi a, mi paruk te erawh chu him taka chhanchhuah an ni, a ti.
Khur chhunga thil puakin gas hlauhawm tak tak a tihchhuah avang leh, khur chhunga tangte hi meter 1,000 vela hlaa an awm avangin chhanchhuah hna thawktute pawhin hna an thawk chak thei lo niin, Iran Red Crescent Search and Rescue Unit hotu Shahin Fathi chuan a sawi.
Iran hian nikum chhung khan lungalhthei ton matkaduai 1.68 vel a laichhuak a, heng zinga tlemte chauh hi ram pawnah thawnchhuakin, a tam zawk chu ramchhunga steel siamna hmunahte hman a ni. Kum 2013 leh 2009 khan Iran rama lungalhthei khurah hian chhiatna a lo thleng tawh bawk a ni.