Paris Agreement aṭanga inhnukdawk lo turin Trump ngen
US-a Governor 11-te chuan President Donald Trump chu Paris Agreement aṭanga inhnukdawk lo turin an ngen.
President Trump-a hnena ngenna thlentute hi California, New York, Oregon, Washington, Pennsylvania, Colorado, Virginia, Connecticut, Hawaii, Delaware leh Rhode Island governor-te an ni. Trump hian Paris Climate Change Agreement chungchangah thutlukna lian tak a siam dawn tih a sawi hnuah, he inremna aṭanga inhnukdawk lo tura ngenna lehkha hi an pe a ni.
Trump hian Paris Agreement chungchang hi a sawisel fo a, he inremna siam hmang hian US chu dik lo taka en bik a ni tiin, India leh China ramten a hlawkna an lo tel thung niin a sawi.
Hetihlai hian Governor-te chuan Paris Agreement hnuaiah hian khawvel ram liante chuan a ṭum khatna atan sik leh sa inthlak danglam chak veng turin hma an la a, China leh India pawh an tel a, heng ramte pawh hian carbon pollution an tihchhuah zat chu tihtlem an intiam a ni, tiin an lehkhaah an sawi.
Paris Agreement hi UN Framework Convention on Climate Change (UNFCCC) huamchhunga siam niin, greenhouse gas tihtlem dan tur chungchang a buaipui a, he inremna hi kum 2015, December 12 khan siam a ni.