France-ah Covid-19 test runpui neih tum

France health minister Olivier Veran chuan an ramah hri kai hriat chhuah zung zung a, hma lak a awlsam theih nan Covid-19 test runpui neih an tum thu a sawi.

He test runpui neih tumah hian a bik takin Covid-19 darhna leh kai tamna hmun hnaia awmte test tir hmasak tum a ni. Hri kai, mahse an taksaa natna langchhuak si lo ten hri an put darh lohna turin a tam thei ang ber test hi mi nawlpuiah neih tum a ni.

France khawpui Paris-ah hian test runpui hmasa ber chu neih tum a ni a, he khawpuia cheng mi maktaduai 2.1 zinga mtd 1.3 chu test neih tir tum an ni. Île-de-France, Grand-Est, Provence-Alpes-Côte d'Azur Hauts-de-France region-ah test runpui hi neih tum a nih thu Veran chuan a sawi.

Tun kar chhungin test 2,50,000 test an ni tawh tih Veran chuan a sawi bawk a, heng zinga 99% chu an negative a ni. March thla tir aṭanga hri a rawn darh chho  khan a tir lamah natna lang chhuak te chauh test an ni a, tunah chuan a tam thei ang ber test neih pui zel an tum ta a ni.May thla aṭang khan kar khatah mi 7,00,000 an test thei tawh a ni. 

Nilaini khan France-ah hian Covid-19 vanga thi mi 11 an awm a, heng mite nen hian an rama hripui vanga thi zat hi 29,731 an tling tawh a ni. March-April thla kha hri leng nasat zual lai a ni a, tunah chuan hri leng hian ziaawm lam a pan tawh a, mahse a la reh mai loh avangin a thawh hnihna lo thleng thei laka inven lawkna turin Covid-19 test runpui hi France-ah neih tum a ni ta a ni.