Britain PM Boris Johnson-a'n PM aṭanga ban a remti

Britain prime minister Boris Johnson chuan amah duh loa minister eng emaw zatin banna an thehluh hnu leh, a thawhpui ngeite pawhin bang tura an nawr hnuah nimin khan prime minister a nihna ṭanga ban a remtih thu a sawi ta.

Boris Johnson kaihhruai Conservative sorkara minister 40 chuang an ban hnu leh, mi ṭhahnem takin PM a nihna aṭanga bang tura an nawr chung pawhin Nilaini thleng khan Johnson hian ban a tum loh thu leh, an ramin inthlanṭhat an mamawh loh thu a sawi. Mahse finance minister atana a ruat thar ngeiin mipui hriatah bang tura a nawr zui leh hnuah ban a remti thu hi nimin khan a sawi ta a ni.

Boris Johnson hian Torry party hruaitu aṭangin banna a thehlut dawn a, mahse amah thlaktu thlan a nih hma chuan PM hna hi a chelh chhunzawm rin a ni.

Kum 58 mi, Johnson hi Tory party hruaitu atana thlan a nih hnuah, kum 2019 July thla khan UK PM atan ruat a ni. Thla nga hnua inthlan an neihah Conservative party hi hneh taka thlan tlin a ni zui bawk.

Johnsona thlaktu tur rin mi hrang hrang sawizui nghal an ni a, foreign secretary Liz Truss, foreign secretary hlui Jeremy Hunt, defence minister Ben Wallace bakah finance minister hlui Rishi Sunak leh health minister hlui Sajid Javid-te hming chu sawirik langsar deuhte an ni.

Bang tura nawr a nihna chhan -
Johnson kaihhruai sorkar hian hmingchhiatna tam tak a lo nei tawh a, chung zinga langsar ber chu an ramah Covid-19 hripui a len laia party an lo huaihawt, Partygate scandal tia sawi zui tak kha a ni. Mi tam tak, an chhungte damlo leh harsatna tawk ngeite pawh hmu thei loa khuahkhirhna khauh tak an hman laia, Downing Street-a party ṭum eng emaw zat an lo huaihawt hian mipui a ti thinurin sawisel pawh an tawk nasa hle. Kumin April 12 khan Johnson hian dan a bawhchhiat avangin police pawhin sum an chawitir thu a sawi a, Britain prime minister ṭanglai zingah dan bawhchhiat vanga hrem tawk hmasa ber a ni. Metropolitan police party buatsaih kaihhnawihah hian lockdown rules bawhchhiat vangin mi 83 zet sum a chawitir bawk.

Downing Street flat chei ṭhatnaah dan kalha sum hmangah Johnson hi puh a ni bawk. Britain electoral commission chuan Conservative party chu flat cheiṭhatna tura donation an hmuh chungchang an report kim tawk loh avangin pound 17,800 a lo chawitir tawh bawk.

Hei bakah hian mipa hmeichhiat lamah a MP ṭhenkhat hmingchhiatna chuan Johnson buaina hi a belhchhah bawk a ni. MP pakhat chu mi pawngsuala puhin man a ni a, MP hlui pakhat chu mipat hmeichhiat lam hawia mipa tleirawl khawiha puh chungchangah May thla khan thla 18 tang tura hrem a ni. Hetianga hmingchhiatna an neih karah, Johnson hian mipat hmeichhiatna lam hawia chet mawi loh avanga sawisel lo tawk tawh, Chris Pincher chu February thla khan deputy chief whip atan a ruat a, beih zui a hlawh hle. July 5 khan Johnson hian mipuite hnenah ngaihdam a dil hial a ni.