Sri Lanka President-in Russia President ṭanpuina dil

Sum lama harsatna nasa tak tawk mek, Sri Lanka president Gotabaya Rajapaksa chuan fuel lakluh dan kawng dap pui turin Russia president Vladimir Putin a ngen tih a sawi.

Gotabaya Rajapaksa chuan President Putin hian inkawmna hun ṭha tak an neih thu sawi a, "Fuel kan lakluh theihna tur mi ngaihtuahpui turin ka ngen a ni," a ti. Russian flag carrier Aeroflot-in thla hmasa aṭanga service an tihtawp hnuah, Moscow leh Colombo inkarah thlawhtheihna service tir leh turin Russia President hi a ngen tih a sawi bawk.

"Tourism, trade leh culture chungchangah thawhduna tihchak a ṭul thu pawh kan pawm a, hei hi ram pahnih inkara thawhdunna sawhnghehnan a pawimawh hle a ni," a ti.

Sri Lanka hian buaina an tawh laiin fuel supply chak zawk an neih theihnan Russia aṭangin oil an lo leisak tawh a, sorkar chuan energy ngah ram aṭangin fuel tam zawk leikhawm zel an tum thu an sawi.

President Rajapaksa hian Sri Lanka-in kum 70 chuang hnua economy lama an harsatna nasa ber an tawh chu siamṭhat tumin hma a la mek a ni. China leh India-te puihna pawh an dil tawh a, mahse inremna an la siam thei lo. Ram pawn lam aṭanga mamawh lakluhna tur sum an neih tawh loh avangin ram chhunga fuel, power, ei tur leh nitin khawsakna atana mamawh dangte indaih lohna a thleng mek a ni.

Energy ministery chuan kar hmasa khan an petrol khawlkhawmsa chu a zo mai dawn tih lo sawi tawh a, thuneitute chuan fuel khawlkhawmsa hum tumin non-essential vehicle tan petrol leh diesel hralhchhuah a lo khap tawh bawk a ni.