US-ah hri kai mtd 20 tlin tawh ring

Centers for Disease Control (CDC) chuan US-a Covid-19 kai zat chu official report aiin a let 10-a an tam a rinawm thu leh, he hri kai hi mi maktaduai 20 an tlin tawh a rin thu a tarlang. 

Sorkar report dan chuan hri kai zat hi mi maktaduai 2.4 niin, mi 1,22,370 in an thihpui tawh a ni. US hi khawvela ram hrang hrang zingah coronavirus kai tamna leh thi tamna ber ram a la ni chhunzawm zel a, tunhnaiah an ram chhim leh khawthlang lam state-ah hri kai hi an pun belh nasa hle.

CDC Director Dr Robert Redfield chuan an chhut dan sawiin, hri kai pakhat chuan  mi dang 10 vel a kaichhawn an rin thu a sawi. Hei hi test neih turah bithliah siam a nih vang leh, natna langchhuak chin chauh test an nih vang a nih tih a sawi. An ram mipuite 5%-8% velah he hri hi a darh tawh a, hei vang hian America mipuite chu hri laka an him theihna turin social distancing dan zawm ṭha a, mask vuah leh kut silte ngai pawimawh turin a ngen.