China-in Covid-19 a ṭha lo zawngin hmang : US senator
Senate Armed Services Committee chairman ni lai US senator Jim Inhofe chuan China chu Covid-19 hri leng chu a ṭha lo zawnga hman a tum niin a sawi. He hri vanga ram dangin harsatna an tawh laiin China chuan ram dangte a bei niin a puh.
Tun hnaiah China-in South China Sea-ah Taiwanese, Malaysian, Vietnamese, leh Indonesian vessel a tih buai thu a sawi a, India pawh ramriah a tihbuai avangin India sipai 20 an thih phah a ni, tiin US National Defense Authorization Act of Fiscal Year 2021 pharhnaah Jim chuan a sawi.
"National Defense Authorization Act of Fiscal Year 2021 hi China leh Russia message thawnna ang a ni a, eng kawng mahin kan ram US chu tihchhiat theih kan ni lo. Ti chhe tur pawn beih buai hranpa kan ngai lo. Khawvelah sipai ṭha ber kan nei a, National Defense Strategy thar kan duang a, hei hi a chhan chu sipai lama min ertu ber China leh Russia ten kan tihdan phung an hriat thiam zung zung vanga thlak kan ni," tiin Inhofe chuan chuan an ram sipai theuneu loh zia a sawi a ni.
China leh Russia chu sipai thuam chakna lamah an ṭang hle a, ralthuam neih theihna kawngah investment an tih nasat avang hian khawvela sipai lama ralthuam nei ṭha ber ram zingah an tel a ni. Ralthuam an neih ṭhat avang hian China chuan Covid-19 hi a ṭha lo zawngin a hmang niin Inhofe chuan a sawi a, sipai chakna lamah China chu a chungnung chho hle a, ram hrang hrangin hri dona kawnga an hun leh thate an sen laia buaina chhuak thei zawnga China chetna chu Inhofe chuan a dem hle a ni.