Syria-in chemical ralthuam siam chhunzawm zel

Syria sorkar chuan chemical ralthuam a siam chhunzawm zel niin khawthlang rama intelligence agency chuan an sawi. Hemi finfiahna tur document pawh an tlangzarh bawk.

Intelligence agency chuan Syria sorkarin chemical raltham a siam chungchang hi Iran leh Russia sorkar pawhin an hriatpui niin an sawi bawk.

Khawthlang ramte chuan Syria sorkar hian thla hmasa khan helho kuta awm, Khan Sheikhoun khua a beihnaah chemical ral­thuam a hman avangin mi 90 dawn an thi niin an sawi. Chemical ralthuam hmanga civil mite beih an nih vang hian US chuan Syria airbase chu missile hmangin a kap zui a ni.

Intelligence agency-in document a tihchhuahah hian Syria hian hmun pathum, Hama province-a Masayaf bakah Damascus pawna Dummar leh Barzeh-ah chemical ralthuam hi a siam nia tarlan a ni a, heng hmun pahthumte hi sorkar agency, Scientific Studies and Research Centre (SSRC) hnuaia mi vek an ni.

Organisation for the Prohibition of Chemical Weapons (OPCW) chuan ralthuam siamna hmun nia sawi pathumte hi February 26 leh March 5 inkar khan an endik tawh a, mahse document aṭanga a lan danin chemical ralthuam hi a rukin an siam niin a tarlang.

Khan Sheikhoun khua beih a nih hnu hian US chuan SSRC hnuaia thawk mi 271-te hrekna tur chu alo siam tawh bawk.

Russia, Iran leh Turkey chuan Syria tualchhung indona thleng mekah, silai hmehpuah phallohna tur hmun pali siam an remti a, hengte hi khawchhak lama Idblib province leh chhim lama Homs province-ahte siam an ni ang. He thil hi tualchhunga tharum thawhna thleng mek tihtawpna tur leh, mipuite hnena chhawmdawlna pek a nih theihna tur a nih thu an sawi. He inremna an siam hi Syria sorkar chuan a pawmpui a, mahse eptu pawl erawh chuan an pawm ve theih loh tur thu an sawi.