Ukraine-a inbeihna bul kan ṭan chauh a ni : Putin Inremna zawnga inbiakna hautak leh sawt dawn

Russia president Vladimir Putin chuan Nilaini khan Ukraine-a beihpui an thlakna chu a bul an ṭan chauh tih sawiin, khawthlang ramte chuan indona tualzawlah chuan hneh tum tura bei turin a cho let zui bawk. Hemi rual hian remna a awm theihna tura inbiakna nei turin an inhawng reng tih a sawi nghal a ni.

Parliament hruaitute hmaa thu a sawiah, Putin chuan indona a thlen rei poh leh remna neih a harsat tur thu a sawi. "Inbeihna tualzawlah min hneh an tum tih thawm kan hria. Enge kan sawi theih, lo tum chhin phawt rawh se," a ti.

"Ukraine mi dam an la awm chhung chu khawthlang ramte hian min beih zel an duh tih thawm vawi tam tak kan hria. Ukraine mipui tan chuan a pawi takzet, buaina punlun zawngin kan kal dawn niin a lang," tiin Putin chuan a sawi.

Russia hian an economy hrek a, Ukraine tan ralthuam ṭha ber ber an thawnlut chungchangah khawthlang ramte chu ramdang phena indona tipunluntuah a puh a ni.

Putin chuan indo ṭantir lam chauh kan la thleng tih sawi mah se, inbiakna neih erawh an hnawl lo tih a sawi. "Inremna nei tura inbiakna pawh kan hnawl chuang lo. Mahse, rawtna hnawltute'n an hnawl rei poh leh inbiakna neih a harsa dawn a ni," a ti. Russia leh Ukraine aiawhte hi ṭum eng emaw zat inremna zawngin an lo inbe tawh a, mahse inremna an la siam thei lo.

February 24-a Ukraine an run hnuah, Russia sipaite chuan ram ṭhahnem tak an la tawh a, Pathianni khan Luhansk region chhak lam chu an laksak leh tawh a ni. Mahse, analyst-te rin ang aiin ram hi an la chak thei lo a, Ukraine khawpui Kyiv leh khawpui lian ber dawttu Kharkiv lak tuma an beihna a hlawhchham a ni.