Japan PM hlui Shinzo Abe kap hlum

Japan prime minister hlui, Liberal Democratic Party hruaitu Shinzo Abe (67) chu nimin chawhma dar 11:30 vel khan Nara khua-a Parliament inthlan neih tur atana campaign-a thu a sawi laiin silaia kah a ni a, Kashihara khuaa damdawi-ina enkawl a nih hnuin a hliam tuar loin chawhnu dar 2 vel, an ram huna tlai dar 5 khan a thi.

Shinzo Abe hi a thusawi lai hian a hnung lam aṭangin ṭum hnih kah a ni a, nikhaw hre loin a awm zui nghal a ni. Kashihara khawpuia damdawi-in an panpui hnuah a hliam tuar loin nimin chawhnu, an ram huna tlai dar 5 velah khan a thi tih puan a ni ta a ni.

Police-te chuan silai hmetpuaktu nia rinhlelh, kum 41 mi Tetsuya Yamagami chu pawikhawihna thlenna hmunah hian an man nghal tih an sawi. PM hlui kahna atan hian tualchher silai a hmang nia sawi a ni bawk. TBS Television chuan Abe hi a awm vei lam leh nghawngah silai mu hian a fuh niin a tarlang.

Japan prime minis­ter Fumio Kishida chuan Nara khawpuia pawikhawihna chu a dem takzet tih sawiin, Japan-a mipui rorelna lungphum tiderthawng theitu chu pawm thiam theih a nih loh thu a sawi. Ram hrang hrang hruaitute pawhin tualthahna thleng chu an dem thu sawiin, Japan leh Abe chhungte an tuarpui thu an sawi.

Japan ramah hian silai khuahkhirhna dan khauh tak an neih avangin politics thila tharum thawhna pawh a thleng khat hle. Senior politician-te chu security force-ten veng ṭhin mah se,a bikin campaign lai chuan mipui zingah chibaite semin an teikual fo a ni. Kum 2007 khan Nagasaki major chu Yakuza gang rualin an lo kap hlum tawh a, Japan Socialist Party hruaitu chu kum 1960 khan a thusawi laiin samurai short sword hmanga thah a lo ni tawh bawk.

Police-te chuan Abe kaptu nia rinhleh Tetsuya Yamagami hi Nara khaw mi a nih thu sawiin, Japan military-ah pawh a lo ṭang tawh niin media lam chuan an tarlang.

Shinzo Abe hi Japan prime minister ni rei ber niin, 2006-2007 leh 2012-2020 chhung PM a ni. PM a nih tirh hian kum 52 mi a ni. Khawvel huapah pawh Japan politician hriat hlawh ber pawl a ni.

Kum 2020 khan taksa lam hrisel lohna avangin PM a nihna aṭangin a bang a, mahse, rorellai party Liberal Democratic Party (LDP)-ah hian thuneihna sang tak a la chelh chhunzawm reng a ni.