Sri Lanka President-in banna thehluh a remti

Sri Lanka mipuite'n an rama economy dinhmun tlahniam zel vanga an lungawi lohzia lantira President chenna in an luhchilh hnuah, president Gotabaya Rajapaksa chuan banna a thehluh a remti.

Parliament speaker Mahinda Yapa Abeywardena chuan Inrinni liam ta khan, Rajapaksa chuan July 13, Nilaini hian ban a tum niin TV-a thuchhuah a siamah an tarlang.

"Buaina awm loa thuneihna inhlanchhawnna nih theihna turin July 13-a ban a tum a ni," tiin Abeyawardena chuan a sawi a, mipuite chu dan palzut zawnga che lo a, boruak ṭha siam turin a ngen nghal bawk.

President ban tur thu an hriat veleh mipuite chuan an ram khawpui Colombo-ah halmawi te halin an lawm zui nghal a ni. "Kum 1948 ni loin, vawiin hi ka tan chuan zalenna ni a ni. A chhan chu lal nunrawng tak aṭangin zalenna kan sual a ni mai lo a, kan ram hruaitu politician tenawm leh duham takte aṭangin zalenna kan sual a ni," tiin pungkhawm zinga mi chuan a sawi.

Inrinni-a mipui lungawi lo ṭhahnem takin President chenna in an luhchilh hmain Rajapaksa chu hmun him lamah hruai chhuah hman a ni.

PM pawhin ban a tum
Mipui lungawi lote hian Prime minister Wickremesinghe-a chenna in pawh luhkhungin, an hal zui bawk.Kangmei hi mipui pungkhawmte hal ngei a nih thu PM office chuan a sawi. Kangmei chhuakah hian thi leh hliam an awm lo nia sawi a ni.

Wickremesinghe hi a hma niin hmun him lamah a lo insaseng hman niin sawi a ni a, ani pawhin PM a nihna aṭanga ban a tum tih a sawi a, hemi rual hian sorkar thar siam a nih hma chuan a bang dawn lo tih a sawi thung.