Ukraine President-i'n ram 5-a an palaite a ban

Ukraine president Volodymyr Zelenskyy chuan India, Germany, Czech Republic, Norway leh Hungary-a an ram palaite a ban.

Presidential website-ah an ram palaite ban an nih thu hi tarlan a ni a, ban an nih chhan erawh sawilan a ni lo a, heng palai ban takte hi sorkarah hna dang pek an ni dawn em tih pawh sawichian a ni lo bawk.

February 24-a Russia-in Ukraine an run hnu khan, President Zelenskyy chuan ram hrang hranga an ram palaite chu Russia do letna tura ramdang puihna leh an sipaite ṭanpuina pek an nih theihna atana theihtawp chhuah turin a lo nawr tawh a ni.

Russia hian Ukraine ramah indona hi kalpui chhunzawm rengin, bomb leh airstrike te a la neih reng avangin civil mi tam tak an thih bakah, an thil neih tam tak a chhe tawh a ni.

India rama Ukraine ambassador, Igor Polika chuan President thutlukna chu mak a tih loh thu sawiin, "Kum sarih chhung ram tana ambassador-a ṭan hnuah, kan rama haw leh hi kan tan chuan thil thlen dan pangngai a ni. Official-a tihfel a nih veleh ka kir thei ang," a ti. Kum 2014-a Russia sipaite'n Crimean campaign an neih hnu lawkah India rama ambassador atan Polikha hi ruat a ni.