France President atan Marcon thlang

France President thar atan kum 39 mi, Emmanuel Macron-a chu thlan tlin a ni ta.

President thlan tawh hnihna, Pathianni-a neihah centrist candidate Emmanuel Marcon leh far-right cnaidate Marine Le Pen-i te an inhmachhawn a, Macron hian vote tla aṭanga 66.06% hmuin hnehna a chang ta a ni.

Marcron hi France President ni thei zinga naupang ber a ni a, kum 1958 hnua party lian pahnih ni lo aṭanga president dinhmun luah thei hmasa ber a ni bawk. Marcon hian President Francois Hollande-a kaihhruai party, Socialist Party chhuahsanin, nikum April thla khan party thar, En Marche! a din a, a party hian parliament-ah seat pawh an la nei ve lo a ni.

France President thar tur, Emmanuel Marcon hi kum 1977, December 21 khan a piang a, a nu leh pa te chu sakhaw mi vak lo an ni a, mahse ama duh thu ngeiin kum 12 mi a nihin Roman Catholic-ah baptisma a chang a ni. A nupui chu school a kallaia an zirtirtu ṭhin, amah aia kum 24-a upa, Brigitte Marcron a ni. President chuh tuma a beihnaah hian nupui hian a ṭawiawm ṭha hle, a thusawi tur te pawh a buatsaihpui ṭhin nia sawi a ni.

Macron hian Nanterre University-ah philosophy aṭangin DEA (Diplôme d’Études Approfondies) degree a zo a, Institute of Political Science (Sciences Po)-ah public affairs-ah master degree zoin, École nationale d’administration (ENA)-ah trianing a nei leh a ni.

Kum 2004-2008 khan Marcon hian French Ministry of Economy hnuaiah Inspector of Finance hna a thawk a, kum 2007-ah deputy rapporteur a ni. A hnuah sorkar hna Rothschild & Cie Banque-ah investment banker-in a lut.

Macron hi kum 2006-20009 chhung khan Socialist Party member a ni a, 2012-2014 chhungin President Hollande-a senior staff niin deputy secretary-general a ni. Kum 2014 August thla khan Minsiter of Economy and Finance-ah dah ni leh bawk.

Kum 2016 khan Socialist party chhuahsanin En Marche! party a din a, August thlaah sorkara a nihnate bansanin President in­thlana chuh a tum thu hi a puang zui.

April 23 khan President thlan thawh khatna chu neih a ni a, candidate 11 awmin Marcon hian vote a hmu sang ber a, mahse president tling tura vote hmuh ngai zat a hmuh phak loh avangin May 7 khan Marine Le Pen-i nen president thlan thawh hnihna hi an hmachhawn a ni.

President thar hi May 11 khian lakluh a ni dawn a, President Francois Hollande a thlak dawn a ni. June 11 leh 18 hian seat 577 awmna, France parliament inthlan buatsaih a ni bawk ang. He inthlanah hian President thar tur, Marcon-a party hian a ṭum khatna atan an chuh dawn a ni. En Marche! party hian parliament-ah seat an la neih loh avangin, President thar tan hian a rawtna leh policy-te parliament-ah a tlang theih nan inthlanpui neih tur hi a pawimawh dawn hle a ni. Inthlanpui neih zawhah, June 18-ah Macron hian a prime minister tur a ruat ang.