Japan inthlanah rorellai party an chak

Japan rama Pathiannia Parliament upper house inthlan neihah, rorellai Liberal Democratic Party (LDP) leh a thawhpuite chu chakin, majority an nei pha ta a ni.

Inthlan neih hma ni hnihah prime minister hlui Shinzo Abe chu a campaign laiin kahhlum a ni a, he thil thleng hian inthlan neih tur boruak pawh a len phah hle.

Seat 125-a inthlan buatsaihah hian prime minister Fumio Kishida kaihhruai LDP chuan seat 63 lain, an thawhpui Komeito chuan seat 13 a la ve bawk. Eptu party lamin seat 49 ah hnehna an chang thung a, upper house-ah hian seat 102 an nei dawn a ni.

Hnehna an chan hnua thu a sawiah, PM Kishida chuan an ram economy tuaithar a, an sum lakluh pawh tihpun chhoh a tum tih a sawi. "Ramdang nena venhimna leh inrelbawlna kawnga harsatna kan neihte a mal te tein sutkian kan tum dawn a ni," a ti.

PM Kishida hian hnehna chang a, upper house-a majority an neih tak avangin an ram danpui siamṭhat tumna kawngah pawh hma a la thei dawn ta a ni.

Kishida leh rorellai LDP kaihhruai ṭangrual sorkar chuan sipai tan sum tam zawk an thehchhuak theih phah dawn bawk a, hei hi prime minister hlui Shinzo Abe-a'n hunrei tak tihhlawhtlin tuma a lo beih tawh a ni. Rorellai LDP hian panel dinin, defence-a sum an hman theih zat chu kum nga chhungin GDP aṭangin 2% a tihsan an rawt a ni.