California-a ram kang thleng mekah Khawvela thingkung lian ber awmna dinhmun derthawng

United States, California-a ram kang nasa tak chhuak mek vangin Yosemite National Park-a khawvela thing lian ber zinga mi, giant sequoias awmkhawmna hmun a tiderthawng hle a, kangmei hi a kan kai ve mai hlauhawmin a awm.

California ram kang, Washburn Fire tiha sawi hi July 7 aṭanga chhuak kha a ni a, ram acre 1,591 vela zau a kang ral tawh a ni. Ram kanna bul hnaia awm camper-te chu hmun him lamah sawnchhuah an ni tawh a, kangṭhelhtute chuan tlangpang chhengchhe takah khawvela thingkung upa leh lian ber ber awmna hmun hi venhim tumin theihtawp an chhuah mek a, kangṭhelhtu pawh hi tam zawk tirh luh belh an ni tawh.

Ram kang hian khawvela thingpui lian ber, giant sequoias kung 500 vel awmna, Mariposa Grove chu a hnaih tawh hle a, helai hmuna thingkung zawm zingah hian kum 3,000 vela upa nia chhut, thingkung lar lak Grizzly Giant pawh a awm a ni. Mahse thingkung lian ho hi kangmei hian tihchhiat a la nei lo.

Washburn Fire vang hian mi 1,600 dawn chu an insawnchhuak tawh a, an zingah hian national park chhunga cheng leh Wawona bula camper-te an tel. Ram kan chhan hi hriat a la ni lo a, fire official-te chuan khaw lum leh boruak ro lutuk avangin kangmei ṭhelh hi a har phah niin an sawi.

Giant sequoias hi khawvela thingkung lian ber zinga mi nia sawi a ni a, a lian ber chu meter 83 (ft 275)-a sang leh, a bul tehkual hi meter 11 (feet 36) a tling. Heng thingkung hi kum 3,000 vel thlengte an dam a, khawvela thil nung upa ber zingah an tel a ni.