Blinken-a'n China leh ASEAN ramte Myanmar sipai hotute nawr turin ti

U.S. secretary of state Antony Blinken chuan Pathianni khan China leh Southeast Asian bloc, ASEAN member-te chu Myanmar-ah mipui rorelna awm leh thuai theihna tur leh, inremna an neih vat theihna turin Myamnar sipai thuneitute chu nawr na turin a ngen.

"China ṭhatna tur pawhin Burma hi an kawng zawh ngai ang kha zawh nawn tir a ṭul a ni," tiin Blinken chuan a sawi.

Bangkok news conference-a thu a sawinaah, Blinken chuan Association of Southeast Asian Nations (ASEAN) member-te chu Myanmar sorkarin "five-point consensus" peace agreement a taka kalpui turin a ngen bawk. "ASEAN-in a duanchhuah kawng ngaa inremna an siam, five point consensus hi tun thlenga hman a la nih loh avangin rang taka kenkawh a ngai," tiin he inremna kalpui a la nih loh chungchangah ASEAN chuan Myanmar mawhphurtuah puh a, an rama tharum thleng mek titawp tur leh tangte chhuah tura an nawr chhunzawm zel a ngai a ni, a ti.

ASEAN member ram pakua leh Myanmar sipai hotu Min Aung Hlaing-te chuan nikum April thla khan inremna ziakin, heng zingah hian Myanmar rama tharum thawhna tihtawp leh party zawng zawngte inbiakna neihpuina turte a tel. Mahse Myanmar sipai sorkar chuan he inremna hi a takin a kalpui chhunzawm lo a, kawng hrang hrangin sipai sorkar dodaltute a bei chhunzawm reng zawk a ni.