Jakarta Governor thiam loh chantir
Indonesia khawpui, Jakarta Governor kalchhuak tur, Basuki Tjahaja Purnama chu Islam sakhua zah lo leh tharum thawhna chawk chhuakah puhnaah thiam loh chan tir a ni a, kum hnih tang tura hrem a ni.
Muslim tamna ram, Indonesia-ah hian Ahok tia hriat lar, Basuki Tjahaja Purnama hi Chinese Indonesian leh Kristian zinga Jakarta Governor ni thei hmasa ber a ni.
Ahok hi nikum September thla khan a campaign-naah Muslim lehkhabu thianghlim, Koran ami thu ṭhenkhat sawichhuakin, Islam sakhua sawichhiatna atan a hmang nia sawi a ni. Nikum December thla khan a thubuai hi ngaihtuah ṭan a ni. Mahse Ahok chuan an puhna chu thu dik lo nia sawiin, court-ah a appeal dawn tih a sawi.
Ahol hian Islam hruaitute chuan Koran-a thute chu voter-te’n Muslim-in Muslim ni lo hruaitu atana thlang lo tura vauna atan an hmang niin a sawi. Governor thusawi hi nasa taka thehdarh a ni a, muslim tam takin a laka lungawi lohna pawh lantirin bang turin an lo nawr fo tawh a ni.
Indonesia hi khawvela Muslim tam berna ram a ni a, a ram mipui zinga 85% chu Muslim an ni. Rights group hrang hrang chuan Indonesia sorkar hi sakhaw tlem zawkte himna ngaipawimawh tawk loah an puh a ni. Sorkar chuan sakhaw sawichhiat khapna dan a neihte hmang dik lo leh, sakhaw tlem zawkte hrekna atana hmangah a puh a ni.