South Korea Presiden thar tur thlang

South Korea mipuite chuan nimin khan an ram president thar tur thlangin vote an thlak.

President thlannaah hian candidate 13 awmin, vote nei mi maktaduai 42.4 an awm a, zing dar 6 aṭangin polling station 13,964-ah vote thlak ṭan a ni a, zan dar 8 thleng hawn a ni. Vote thlak hmasak hun buatsaih, May 4 leh 5-ah khan mi maktaduai 11 vel chuan vote an lo thlak tawh a ni. National Election Commission (NEC) chuan vote tlakṭhat an rin thu leh, 80% a tlin an rin thu an sawi.

South Korea President hlui Park Guen-hye-i chu eiruknaa inhnamhnawih leh a thuneihna dik lo taka hmanga puh a nih avangin March thla khan president a nihna aṭangin paihthlak a ni. Park-i hi jail-ah a tang mek a, nimin­ah pawh vote a thlak ve duh lo nia sawi a ni.

Candidate zingah Democratic Party candidate Moon Jae-in (64) chu tling tura rinkai ber a ni a, kum 2012-a president thlanah khan chuh tawhin Park-i a hneh zo lo a ni. Moon hi human right lawyer leh President hlui Roh Moo-hyn hnuaia chief of staff lo ni tawh a ni a, amah khing thei tura ngaihte chu conservative Liberal Korea Party candidate Hong Joon-pyo leh People’s Party candidate Ahn Cheol-soo-te an ni a, an pahnih hian mipui ngaihdan lak hnuhnung berah 20% dawn an hmu pha ve ve a ni