Iran-in Pakistan vau

Iran chuan Pakistan-in firfiakten Iran border guard-te an beih ṭhin a dan theih loh chuan Pakistan ram chhunga firfiakte hmun chu tihchhiatsakah a vau.

Thla hmasa khan Pakistan firfiakte chuan ramria duty, Iran border guard 10 chu an that a ni. Iran chuan border guard beitute hi firfiak pawl, Jaish-ul-Adl niin a sawi a, guard-te hi Pakistan ram chhung aṭangin long-range gun hmangin an kap niin a sawi.

Chief of Iranian Armed Forces Major General Mohammad Baqeri chuan an hmelmate chuan fir­fiakte chhawrin, Iran ramri leh a ram mite an bei ṭhin niin a sawi. Border guard-te beih a nih dan chu mi dawihzep thiltih a nih thu a sawi bawk.

Baqeri chuan Pakistan nena an inrina Pakistan ram lam chin chu Saudi-in firfiak a chhawr, US thlawpna dawngte tan zalen taka an awm theihna leh an training-na hmunah a chang niin a sawi.

Jaish-ul-Adl chuan Iran border guard beitute an nih thu sawiin, guard-te an beihhnu hian Pakistan lamah an kir leh nghal tih a sawi. He pawl hian kum 2015 April thlaa boder guard pariat thattu leh, kum 2015 October thlaa border guard 14 thattu an nih thu a sawi bawk.