S.Korea President thar Moon Jae-in la lut

South Korea President thar atan Democratic Party candidate, Moon Jae-in-a chu thlan tlin a ni a, nimin khan an ram President 12-na atan rinawmna thu tiam tira lakluh nghal a ni.

Thawhlehni khan South Korea mipuite chuan president thar thlangin vote an thlak a, inthlan result hi zanah chhiar nghal niin Moon Jae-in-a hian vote tla aṭanga 41% hmuin, hnehna a chang a ni. Amah hnaih bertu conservative candidate Hong Joon-pyo chuan 25.5% a hmu. Kum 64 mi president Moon hi nimin khan Seoul-a National Assembly-ah President thar atan lakluh nghal a ni.

President atana lakluh a nih hnua thu a sawina hmasa berah, Moon chuan an ram sum leh pai dinhmun leh, North Korea nena an inkar boruak siamṭha tura a beih tur thu a sawi. A boruakin a zir a nih chuan North Korea ram tlawh pawh a hreh loh thu a sawi bawk.

Human rights lawyer, Moon Jae-in hi North Korean refugee fapa a ni. Lehkha thiam thei tak niin Judicial Research and Training Institute aṭangin law a graduate a, mahse zirlai a nih laia nawrh huaihawtnaah a tel avangin judge emaw, prosecutor emawah a lut thei lo a, lawyer a ni ta zawk a ni. Newspaper ‘The Hankyoreh’ dintu zingah a tel a ni.

Moon Jae-in hi President hlui Roh Moo-hyn hun laiin cheif of staff atan dah a ni a, hei bakah hian chanvo pawimawh dangte pawh a chelh bawk. Prosecutor-te’n eiruk chungchanga Roh an chhui khan a legal counsel-ah a ṭang zui a ni. Roh hi a intihlum a, a vuina leh a mimal thil chinfel tur awm pawh Moon hian a buaipui vek a ni.

Moon hian kum 2012 president thlanah pawh khan a lo chu tawh a, mahse Park Guen-hye-i a hneh zo lo a ni. Kum 2015, February 2 khan New Politics Alliance for Democracy hruaitu atan thlan a ni. Eiru leh thuneihna hmang dik loa puh, president hlui Park-i paih­thlak a nih avangin kum laklawhah President thlanna hi buatsaih a ni a, President thar Moon Jae-in hian Park-i term hman zawh lo a hman tel dawn bakah, a president term kum nga hun a hmang bawk ang. Park-i term hi kum 2018, February thlaah a tawp dawn a ni.