Myanmar-ah Buddhist leh Muslim intibuai

Myanmar rama Yangon khawpuiah Buddhist leh Muslim-te inkarah buaina a chhuak leh.

Myanmar ramah hian sakhaw pahnih zuitute inkarah hian buaina a lo chhuak fo tawh. Thla hmasa khan Buddhist puithiam kalfawr leh anmahni zuitute chuan Yangon-a Muslim school pahnih chu an lo khar luih tir tawh a ni. Nimin khan Buddhist mi ṭhenkhat chu Muslim ho awmna bialah kalin, Rohingya Muslim-te chu an ramah dan loa lutin an biru niin an puh a, an intibuai zui ta a ni. Police-te chuan buaina chhuak ṭhelh tum hian van lam hawiin silai pawh an hmet puak a ni.

Rohingya Muslim-te hi Myanmar-in citizenship ala pe duh lo a, an zinga maktaduai khat chuang chu Myanmar khawthlang lam Rakhine state-ah an khawsa a, special permission nei lo chuan hmun dangah an zin pawh phalsak an ni lo.

Kum 2012 khan Rakhine state-ah hian Buddhist leh Muslim inkarah buaina nasa tak a chhuak a, nikum October thla atang khan sipaite chuan Rohingya te lakah hian beihpui an thlak thar leh bawk. Buaina chhuak vang hian Rohingya mi 75,000 vel chu Bangladesh ramah an tlanchhe tawh a ni.