Japan PM hlui Shinzo Abe vuiliam a ni ta

Japan prime minister hlui, kar liam taa inthlan campaign a neh laia kah hlum, Shinzo Abe chu nimin khan vui liam a ni ta.

Shinzo Abe vuina hun hi Zojoji temple-ah neih a ni a, vuina inkhawmah hian a chhungte leh thawhpui tlemte chauh an tel.

Vuina hun hman zawhah Abe ruang hi phur chhuah a ni a, Tokyo kawtthlerah an ram PM hlui thlah tur hian mipui tam tak an pungkhawm a, a ruang phurtu motor chu pangpar nen an lo vai liam a ni. Thawhṭanni zan leh nimin zing khan mi tam takin temple-ah Abe ruang hi hmuin, zahna an hlan. Politician, ram dang palai leh sumdawng lian tak takte pawh an kal a ni.

Kum 67 mi, Japan PM ni rei ber, Shinzo Abe hi kar liam ta Zirtawpni khan Nara khuaa inthlan campaign neia thu a sawi laiin silaia kah a ni a, damdawi-in panpui nghal mah se an chhan hman lo a ni.

Khawvel ramdang hruaitute chuan Abe an tawrhpuina thu sawiin, tawrhpuina thu hi 2,000 dawn an dawng a ni. Japan tana thawhhlawk tak, ṭhenkhatin an ram ṭhendarhtua an puh thung, Abe hi kum 2006-07 leh 2012-20-a Prime Minister ṭum hnih term a chelh chhung khan an ram chu economy lamah nasa taka an ṭhan bakah an ram ṭhenawm China tluk phak khawpin an ram dinhmun chu a sawi danglam a ni. Abe hi venhimna kawnga thawhhlawk tak, Japan thawhpui US ṭan tlattu leh postwar global order vawnhim tuma theihtawp chhuah ṭhin a ni.

Abe kaphlumtu nia puh, kum 41 mi Tetsya Yamagami chu pawikhawihna thlen ni khan police-ten an man nghal a ni. Yamagami hi military member hlui a ni a, a nuin sum tam tak a thawh ṭhina sakhaw pawl pakhat chu Abe hian thlawpin tihlar a tum niin a puh a, hei vang hian a that niin a sawi.