Iran-in Russia hman tur drone thawnluh tum

Iran chuan Ukraine nena indo mek Russia tan drone ṭhahnem tak, indonaa hman theih tur thawn a tum niin US official-te chuan an sawi.

White House national security advisor Jake Sullivan chuan thu an dawn danin, Iran hian drone hman dan turah Russia sipaite chu training pek an tum a, an pe tawh em tih erawh hriat chian a ni lo, a ti.

Drone hi Ukraine leh Russia indonaah ram pahnihte hian an hmang ṭangkai ṭhin hle. Kar hmasa khan, Ukraine chuan indona thleng mekah drone ṭhahnem tak thawn turin ramdang hnenah ngenna an lo siam tawh bawk a ni.

Sullivan chuan Russia-in Ukraine khawchhak lama inbeihna an kalpui avangin an ralthuam tam tak an chelek phah tih an sawi. Iran drone-te hi Yemen-a Houthi hel hoin Saudi Arabia beihna atan an hmang ṭhin tih a sawi bawk.

US president Joe Biden-a'n tunkar tawp lama Israel leh Saudi Arabia a tlawh hmain he thuchhuah hi an siam a ni. Ram pahnihte hian Russia hrekna an la tichhuak lo ve ve a ni. Hetih lai hian US leh a thurualpui ram dangte chuan Ukraine tan hian ralthuam ṭhahnem tham tak an thawn lut tawh. Sullivan chuan Ukraine ram venhimna kawngah US chuan theihtawp an chhuah chhunzawm zel tur thu a sawi.