S.Korea president-in chanvo pawimawh chelh turte ruat nghal

South Korea President thar, Moon Jae-in-a chuan nimin khan prime minister, intelligence agency chief, presidential chief of staff leh chief of presidential security turte a ruat nghal.

Moon Jae-in-a hi Thawhlehni khan Presiden atan thlan tlin niin, Nilaini khan rinawmna thu tiamtira lakluh a ni a, lakluh a nih hnu hian a kaihhruai sorkar hnuaia chanvo pawimawh chelh turte hi a ruat fel nghal a ni.

Prime Minister atana ruat hi South Jeolla province governor ṭanglai, Lee Nak-yon a ni. Lee hi kum 65 mi niin, journalist hlui a ni a, kum 2000 khan politics-ah a lut a, Parliement member atan term li thlan tlin a ni tawh. President hlui Kim Dae-jung leh Roh Moo-hyun hnuaiah sorkar thupuangtu atan ruat a lo ni tawh a, kum 2014 khan provincial governor atan thlan a ni.

President-in prime minister atana a ruat hi parliament-in a pawmpui ve leh phawt a ngai ang.

Kum 51 mi, Im Jong-seok chu presidential chief of staff atan ruat a ni bawk a, a ni hi president thlan dawna Moon-a campaign team-a chief of staff kha a ni. Kum 2000 khan politics-ah lutin New Millenium Democratic Party a zawm a, hemi kum vek hian Parliament member atan thlan niin, member thlan tlin zinga naupang ber a ni.

Intelligence agency hotu atan kum 63 mi, Suh Hoon chu ruat a ni bawk. Suh hi National Intelligence Service-a vice director hlui a ni. Kum 61 mi, Joo Young-hoon chu presidential security service hotu atan ruat a ni bawk.