Brazil President hlui court-ah inlan

Brazil President hlui Luiz Inacio Lula da Silva chu Nilaini khan eiruk thubuaiah corut-ah a inlan.

Kum 71 mi, Lula hi politician leh official-te’n contract pekna tura thamna sum tam tak an lak chungchang a chhuina, Operation Car Wash-ah chhui tel a ni. President term hnih a chelh chhung, kum 2003-2010 inkar khan a kaihhruai sorkarah eirukna a hluar hle a, sorkar scheme hrang hrang aṭangin mimal taka hlawkna telah puh a ni bawk.

Curitiba khuaa courthouse-a a inlan hma hian President hlui thlawptu mi tam tak an pungkhawm a, Lula chuan an puhnate chu thu dik lo a nih thu a sawi. Lula chuan Judge Sergio Moro hnenah thubuai an siamsak chu dan kalh a nih thu leh, an puhnate pawh thu dik lo a ni tih a hrilh a, prosecutor-te chuan finfiahna dang engmah nei loin, chanchinbu mite puhna beh­chhanin thubuai hi an siamsak mai niin a sawi.

Operation Car Wash hnuaiah hian politician leh sumdawng lian 90 chuang chhui mek an ni a, an zingah hian Congress member ṭanglai eng emaw zat an tel a, President Michel Temer-a cabinet member hmun thuma ṭhena hmun khat an tel bawk.