Mosul indona zo thuai dawn

Iraq sipaite chuan Islamic State (IS) firfiakte kut aṭangin an ram khawpui pawimawh, Mosul khua chu an la fel dawn hnai tawh niin, army chief of staff chuan a sawi.

Lt. Gen Othman al-Ghanimi chuan May 26-a Islam ho thla thinghlim, Ramadan a inṭan hma ngeiin khawpui chhunga firfiakte chu hneh hman ngei an beisei thu a sawi. Khawpui chhung hmun tam zawk hi sipaite kutah a awm tawh a, khawthlang lam bialah firfiakte hi la awmin sipaite nen an inbei mek a ni.

Kum 2014 khan Mosul khua hi IS firfiakten Iraq sipaite kut aṭangin an laksak a, nikum October thla khan sipaite hian khawpui hi laklet tumin beihpui an thlak a, US kaihhruai ṭangrual ramten an pui bawk. January thlak khan Mosul khawchhak lam bial chu an la fel tawh a, hma an sawn zel a ni.

Firfiakte kuta la awm, Mosul hmar thlanglam bialah hian IS firfiak 1,000 aia tam lo an awm nia chhut a ni a, he bial huam chhungah hian civil mi 4,50,000 vel an cheng a ni.

United Nations chuan Mosul khuaa inbeihna avang hian civil mi hliam tuar leh thi 8,000 chuang an awm niin a sawi. Iraq sipaite chuan thi leh hliam tuar zat hi a tarlang ve lo a, mahse US general chuan March thla tawp thleng khan inbeihna thleng vang hian Iraq sipai 774 an thi tawh a, mi 4,600 in hliam an tuar bawk niin a sawi.

Sipai leh firfiakte inbeihna avang hian civil mi 6,20,000-te chuan an in leh lo an tlanchhiatsan tawh a, an zinga mi 4,14,000 chu khawthlang lam biala chengte an ni. UN chuan inbeih chhunzawm zel ala nih avangin mi 1,00,000 - 2,00,000 vel chu an la tlanchhiat leh a rinawm thu a tarlang bawk.