Pope Francis-a’n Portugal a tlawh

Roman Catholic kohhran hotu, Pope Francis chuan Portugal-a sakhaw hmun pawimawh Fatima tlawhin, he hmuna hian beram vengtu pahnihte chumi thianghlimah a puang dawn a ni.

Kum 100 liam tawhah khan central Portugal-a Fatima-ah beram vengtu naupang pathum te chuan beram an ven laiin Virgin Mary an hmu a, a hmutu zinga pahnih hi mi thianghlim­ah puan an ni dawn a, pakhat dang pawh hi puan thuai tum a ni bawk.

Jacinta leh Francisco Marto-te chu vawiin hian mi thianghlimah puan an ni dawn a, he hun hmanpui tur hian khualzin tam tak an kal rin a ni. An thil hmuh hi an zinga pakhat, Lucia dos Santos chuan ziakin a chhinchhiah a, kum 2005 khan kum 97 mi niin a thi tawh a ni. Jacinta leh Francisco-te hi kum 1917-18 khan an thi tawh bawk.

Pope-in a tlawh avang hian Portugal sorkar pawhin venhimna a uluk a hle a, Fatima-a inkhawmna tur hmunah hian police 6,000 bakah emergency worker-te dah an ni. Firfiakten lirthei an beih tur venna turin kawngpui kalpawhnaate cement block dah a ni a, ramri pawh hmun pakuaah chauh hawn a ni.

Portugal hi Roman Catholic tamna ram niin, ram mipui zinga 81% chu Roman Catholic an ni. Pope hlui pahnih John Paul II leh Benedict XVI te pawh khan Fatima hi an lo tlawh tawh a ni.