NKorea-in ballistic missile enchhin leh

South Korea president thar lakluh aṭanga ni reiloteah, a ṭhenawm North Korea chuan ballistic missile a enchhin leh nghal.

NKorea hian nimin khan hmarthlang lam, Kusong aṭangin ballistic missile hi a kap chhin a, km 2,000 chin a kap pha a ni.

UN-in nuclear leh ballistic missile lam chi enchhin a khapsak chungin, NKorea hian kumin chhungin ṭum eng emaw zat a enchhin lui tawh a, ram hrang hrangten demin, a bikin US nen phei chuan an inkar boruak a chhiat zual phah hle. US President Donald Trump chuan NKorea hi na zawka hrek a duh thu a sawi.

Japan defence minister Tomomi Inada chuan nimina NKorea missile enchhin hi boruakah darkar chanve vel a thlawh hnuin Sea of Japan-ah a tla niin a sawi a, missile enchhin hi eng chi nge tih hriatchian a ni lo a, a chi thar a ni mai thei niin a sawi bawk. Kumin February-a NKorea-in intermediate-range missile a kahchhuah aiin a thleng sang thei zawk niin a sawi bawk.

US Pacific Command pawhin nimina NKorea missile kahchhuah hi eng chi nge tih an zirchiang mek tih a sawi a, mahse US ram laili kap pha tur a ni lo niin a sawi. NKorea hian US ram laili, km 6,000 chin kap pha thei tur Intercontinental Ballistic Missile (ICBM) pahnih a siam mek nia hriat a ni a, mahse enchhin an la ni lo.