Syria sipaiten IS kut aṭangin Jarrah Airbase la let

Syria sipaite chuan hun eng emaw chen Islamic State (IS) firfiak nena an inbeih hnuah an ram khawchhak lam khawpui, Aleppo-a Jarah airbase chu kar kalta Inrinni khan an la let leh thei ta.

IS-te hian Jarrah airbase hi kum 2014, January thla khan an la a ni. Sipaite hian airbase hi lak let tumin May 9 khan an nawr ṭan a ni. Jarrah airbase hi kum 2013 khan sipaite kut aṭangin helpawl dang, Free Syrian Army chuan an lo la tawh bawk a ni.

Syria sipaite hian kumin January thla laihawl aṭang khan Aleppo biala firfiakte nawr chhuah tumin beihpui an thlak ṭan a ni. Sipaite hian firfiakte kut aṭang hian khaw 170 vel an la let tawh a ni.

Syria rama IS firfiakte hi Syria sipaite bakah, khawchhak lamah Syrian Arabs leh Kurds-te chuan US puihnain beihpui an thlak ve mek bawk a ni.

Kum 2011, March thlaa tualchhung indona a thlen aṭang khan Syria mi nuai li vel an thi tawh a, mi nuai sawm chuang chu hmun him lamah an tlanchhe tawh bawk.