Sri Lanka President-in an ram tlan chhuahsan

Sri Lanka president Gotabaya Rajapaksa chuan nimin khan a rukin an ram a tlan chhuahsan.

An ram economy tlakchhiat avanga harsatna lian tak an tawh mek kara mipuite'n lungawi lohna lantira bang tura an nawrna a remtih hnuah, President a nihna aṭanga a ban hmain an ram a chhuahsan a ni.

Rajapaksa bakah a nupui leh bodyguard pahnih-te chuan Sri Lankan Air Force thlawhtheihnain Maldives khawpui, Male an pan tih Sri Lankan Air Force thuchhuah chuan nimin khan a tarlang.

"Sorkarin a ngen avangin Sri Lanka Air Force chuan president leh a nupui bakah security official pahnihte hman tur thlawhtheihna a pe a ni," tiin thuchhuah chuan a sawi.

President chuan Inrinni liam taa mipui lungawi lote'n a ban phuta president official residence an luhkhung hnuah, ṭangrual sorkar din a nih theihnan bang turin mipui hmaah a lo intiam tawh a ni. Nilainiah a bang ang tiin a sawi a, mahse a ban hmain an ram hi a tlan chhuahsan ta a ni.

Rajapaksa hian kum 10 chuang liam taa a unaupa in thuneihna a chan lai khan defence secretary hna chelhin, Sri Lanka civil war tihtawpna turin a thawhlawk hle. Kum 2019 khan President atan thlan tlin a ni a, an ram dinhmun ngelnghet zawk siam a tiam a ni. Mahse sokarin chhiah lak a tihtlem chuan sorkar sum lakluh nasa takin a tlakhniam phah a, ram danga aṭanga bungrua leh mamawh lakluhna tur sum indaih lohna tawk chhoin, ram chhungah fuel, ei tur leh damdawi indaih lohna a thleng mek a ni.

Sri Lanka mipuite chuan an ram economy tlakchhiat chungchangah President hi mawhphurtu leh, ram enkawl thiam lohah puhin, Gotabaya bakah Rajapaksa chhungkaw laka lungawi lohna lantirin nawrh an huaihawt zui reng a ni. May thla khan mipuite nawrh huaihawt vang hian Mahinda Rajapaksa chu prime minister a nihna aṭangin a lo bang tawh bawk.

Gotabaya Rajapaksa hi war crime leh human rights palzutaah puh a ni a,mahse President a nih chhung chuan man theih loha hum a ni a, kar liam ta Zirtawpni aṭang khan mipui hmunah pawh a inlan tawh lo a ni. Hei vang hian man a pumpelh theih nan, President aṭanga a ban hma ngeia ram danga tlanchhiat hi a duh ta nia rin a ni. Anti-corruption group Transparency International chuan Gotabaya leh a thawhpui midang pangate chu an ram chhuahsan khapsak turin thubuai a lo thehlut tawh bawk a, hei hi nimin khan ngaituah tura tih a ni.