Covid hri leng a la tawp mai dawn lo : WHO chief

World Health Organization (WHO) hotu Tedros Adhanom Ghebreyesus chuan coronavirus hri leng chu a la tawp mai dawn lo tih sawiin, khawvel pumah hri hi zalen taka a len mek avangin ngaihven thar leh a ngai tih a sawi.

Ghebreyesus chuan health system leh health worker-te chu taima zawka thawk turin a chah a, "Hrileng hian min luhchilh zel avangin kan beih let a ngai a ni. Hripui len tirh ai kha chuan dinhmun ṭha zawkah kan ding tawh a ni," tiin Thawhlehnia Geneva-a news conference-ah a sawi.

"Hmasawnna tamtak kan hmu tawh a ni. Hri inkaichhawn, damdawi-ina dahluh ngai leh thihna pumpelh turin hmanraw him leh ṭha tawk tak kan nei a, ṭangkai takin kan hmang tur a ni," a ti. Covid hri inkaichhawng pung zel leh damdawi-ina dahluh ngai pung chho zel vangin Tedros chuan sorkarte chu hri leng khuahkhirh kawnga rintlak leh hmantlak a ni tih mithiamten an finfiah tawh, heng mask hman te, boruak thianghlim luhna ṭha neih te leh 'test and treat protocol' te chu zawm turin a ngen.