Donald Trump-a’n NKorea hrekna na zawk siam rawt

US President Donald Trump chuan North Korea-in ballistic missile a enchhin leh avang­in hrekna na zawk siam a rawt.

President Trump chuan thuchhuah siam­in, NKorea thiltih chu ram hrang hrangte tan hrekna siam belhna khawp thil a ni, a ti. NKorea missile kahchhuah hi Russia ram bulah a tlak avangin, Russia pawh alawm loh hle a rin thu a sawi bawk.

Russia defence ministry chuan Pathianni-a NKorea-in missile kahchhuah hi an ramri aṭanga km 500 vela hlaah a tla tih sawiin, an ram tan a hlauhawm pha lo tih a sawi thung.

Trump-a national security adviser, HR McMaster chuan Japan leh South Korea security adviser-te biain, NKorea chungchang hi a sawipui nghal a ni. Hetihlai hian China chuan ram hrang hrangte chu insum turin a ngen a, boruak ṭha lo zawk siam lo turin a ngen.

Kar kalta Nilaini-a South Korea president thar atana lakluh, Moon Jae-in chuan NKorea chetdan chu inpalzutna lian tak nia a ngaih thu a sawi a, national security adviser-te nen emegency meeting an nei nghal a ni. Moon-a hian president atana lakluh a nih hnuah North Korea nena an inkar boruak siamṭhat a, in­biakna pawh a ṭul a nih chuan neih a duh thu a lo sawi tawh a, mahse Pathianni-a NKorea-in missile a enchhin leh hnuah NKorea-in a awmdan a thlak chauhin inbiakna hi neih theih a ni ang, a ti.

Japan Prime Minister Shinzo Abe chuan NKorea missile enchhin chu pawmzam mai theih loh a ni tih sawiin, an ram tan pawh a hlauhawm niin a sawi.