Tui hri leng vangin Yemen-ah emergency puang

Yemen sorkar chuan an ram khawpui, Sanaa-ah tuihri, cholera leng vangin state of emergency a puang.

Sanaa-ah hian tuihri vang hian mi eng emaw zat an thi tawh a, hospital hrang hrang pawh a tawt hlawm hle. Red Cross chuan kar khat chhung khan Yemen ramah hian tuihri vei hi a let thum zetin an pung hman niin a sawi.

Yemen ramah hian tual­chhung indona a thlen reng avangin mipute dinhmun a ṭha lo hle a, ram mipui hmun thuma ṭhena hmun hnih chuan tui thianghlim in tur pawh an nei lo nia sawi a ni. Hei vang hian hri leng pawh hi a darh chak hle a ni. Tualchhunga indona thleng vang hian ram chhunga hospital leh clinic 300 dawn chu tihchhiat a ni bawk.

International Committee of the Red Cross operations director, Dominik Stillhart chuan ram pumah April 27- 13 May inkar khan cholera hri leng vanga thi hi mi 115 an tling niin a sawi.