NKorea missile enchhin ballistic rocket chi thar
North Korea-in Pathianni-a ballistic missile a enchhin chu ram dangten eng ang chi nge an hriat mai loh thu an sawi hnuin, NKorea chuan ballistic rocket chi thar, nuclear ralthuam phur thei a nih thu a sawi.
Pathianni khan NKorea hian missile kapchhuak lehin, km 2,000-a sangah a thlawk a, km 700-a thui a thlawh hnuin Japan khawthlang lam tuipuiah a tla a ni. NKorea chuan nimin khan ballistic rocket chi thar, Hwasong-12 chu hlawhtling taka enchhin a nih thu a tarlang.
UN-in a hrek chungin North Korea hian kuminah pawh missile hi vawi eng emaw zat a enchhin tawh a, mahse a hlawhtling vek lo. Ram hrang hrangte chuan na takin an sawisel a, hrekna na zawk siam pawh an rawt a ni.
US leh Japan-te chuan NKorea-in missile a enchhin leh avang hian UN Security Council emergency meeting ko turin an phut.