US state ṭhenkhatin inthlahdul tumna sût

US-ah hripui lengin zual lam a la pan zel a, hei vang hian state ṭhenkhat chuan khuahkhirhna thlahdul an tumna chu an sut leh. 

State 12 - Arizona, Arkansas, Delaware, Florida, Idaho, Louisiana, Maine, Nevada, New Mexico, North Carolina, Texas leh Washington-te chuan Inrinni khan hri leng vanga khuahkhirhna siamte thlahdul an tum chu sut leh a nih thu an sawi a ni. 

Inrinni liam ta khan US-ah hian hri kai thar mi 42,000 an awm a, a zawnin ni hnih chu hri kai thar hi 40,000 an chuang tawh a ni. An rama hri kai hmuh tawh hi maktaduai 2.5 an chuang tawh a, an zinga 1,25,000 chuangin an thihpui tawh bawk. 

Italy Health ministry chuan an ramah Covid-19 kai enkawl mek zinga ICU-a dah ngaih chu 97 chauh an awm tawh tih Inrinni khan a sawi. 

Inrinni khan he hri vanga thi hi mi pariat an awm leh a, Covid-19 kai thihpui hi mi 34,716 an awm tawh a ni. Hemi ni vek hian hri kai hmuh chhuah thar mi 175 an awm bawk.

Italy-ah hri kai enkawl dam hi 1,88,584 an awm tawh a, hri kai mek hi mi 16,836 an la awm. An zinga 1,260 chu damdawiinah enkawl an ni a, asymptomatic leh na vak lo mi 15,479 te chu in lamah enkawl an ni thung. 

Worldometers-in a tarlan danin, nimin thleng khan khawvel ram hrang hranga Covid-19 kai awm zat chu 1,01,05,649 an tling tawh. An zinga 5,01,696 chu he hri vang hian an thi tawh a, hri kai enkawl dam tawh hi 54,77,859 an awm tawh bawk a ni.

US chu hri kai tamna leh hri vanga thi tamna ber ram a ni chhunzawm zel a, US dawtah hian Brazil awmin hri kai  13,15,941 awmin thihpui mi 57,103 an awm tawh bawk. 

Russia, India, UK, Spain, Peru, Chile, Italy leh Iran ramte chu hri kai tam zualna ram 10 zingah an tel. 

North America, Latin America leh Europe-ah hri kai hmuh chhuah zinga 25% vel ṭheuh an awm a, Asia leh Middle East-ah 11% leh 9% an awm bawk. Hri kai hmuh belh pung zel mah se March thlaa hri hmuh thar punna 10%  a nih laiin kar liam ta kha chuan 1-2% ah a tlahniam tawh a ni.