Trump-a’n Russia hnenah IS thuruk a hrilh

US President Donald Trump chuan Russia foreign minister Sergi Lavrov-a hnenah Islamic State (IS) chungchanga thuruk pawimawh tak a hrilh niin, Washington Post chanchinbu chuan a tarlang.

Official-te chuan media report hi thu dik lo niin an sawi thung a, mahse Republican party senior member chuan hemi chungchang hi sawifiah turin a phut thung.

US Presiden thlan dawna campaign laiin Trump-a team hi Russia nena inzawmna neia puh an lo ni tawh bawk a, mahse president chuan an puhna hi thu dik lo tih a sawi. Hemi chungchang hi FBI chuan a chhui mek a ni.

Russian foreign minster Lavrov hian kar kalta khan US tlawhin, President Trump nen hian Oval Office-ah an inkawm a, he meeting-ah hian Russian ambassador Sergei Kislyak pawh a tel. Ram hruaitute hian IS firfiak chungchang an sawi a, an ti ti na karah Trump hian thuruk ṭhenkhat a sawichhuak ta niin media report chuan a tarlang.

Meeting hi Trump-a’n FBI hotu James Comey a ban tukah neih a ni a, meeting-ah hian Russian photographer tel phalsak a ni a, mahse US media-te erawh chu tel an phalsak lo thung.

Democrats member Dick Durbin chuan President thiltih dan chu thil hlauhawm tak leh ven ngai tak niin a sawi. House of Representatives-a Republican speaker Paul Ryan-a thupuangtu chuan meeting-ah hian eng nge an sawi tak an hriat loh thu leh, mahse ram thuruk vawnhim tlat chu thil pawimawh tawp a ni, a ti. Thuneitute chu thil awmdan dik tak sawifiah tura a phut thu speaker chuan a sawi bawk. Senate Foreign Relations Committee hotu, Bob Corker pawhin report chu thu dik a nih chuan thil pawi tak a nih tur thu a sawi.

Trump national security adviser Hr McMaster chuan Washington Post report chu thu dik lo a nih thu a sawi a, meeting lai hian room chhungah a awm ve a, President hian sipaiten beihpui an thlak chungchangah mipuiten an la hriat loh thil sawichhuah engmah a nei lo tih a sawi thung.