Covid-19 vaccine siam turin Brazil leh UK thawkdun

Brazil health ministry chuan kar liam ta Inrinni khan United Kingdom (UK) nen Covid-19 vaccine siamna kawngah an thawk dun tih a puang.

UK-ah hian University of Oxford leh British pharma­ceutical company AstraZeneca chuan Covid-19 vaccine siam tumin hma an la mek a, Brazil chuan a  thawhpui dawn a ni.

Thawhdunna hi a hlawhtling a, damdawi hmuhchhuah a nih hunah damdawi dose maktaduai 100 vel chu Brazil mipui tana ruahman a nih tur thu leh, he damdawi hmuhchhuah turin technology lamah UK chuan an pui dawn tih Brazil health ministry thuchhuah chuan a tarlang. 

Brazil-a British embassy chuan Covid-19 damdawi, ChAdOx1 vaccine hmuh chhuah­na kawngah ram pahnihte hi an thawk dun dawn tih hi a tichiang tawh bawk a ni. 

Brazil secretary of health surveillance Arnaldo Correia de Medeiros chuan an ramin UK technology hmanga damdawi hmuchhuah an tum thu a sawi a, an rama Oswaldo Cruz Foundation (Fiocruz) chuan damdawi siam hna hi a thawk dawn tih a sawi bawk.