Sri Lanka PM-in muanna a awm theihnan sipaite thuneihna a pe

Sri Lanka prime minister Ranil Wickremesinghe chuan Nilainia mipui lungawi lo pungkhawmin a office an luhkhung hnuah boruak muanawm a awm theihna turin an ram sipaite chu a ṭul anga hma la turin thuneihna a pe.

Himna zawnga Maldive rama tlanchhia, Sri Lanka president Gotabaya Rajapaksa chuan Wickremesinghe hi acting president atan a rawn ruat a, mahse hei hian mipui a tithinur zual a, prime minister pawh bang turin an phut zui bawk a ni.

Sri Lanka-a buaina chhuah chhanah mi tam tak chuan Rajapaksa-te chhungkua chu puhin, May thlaa prime minister atana ruat Wickremesinghe chu buaina belhchhahtuah an ngai a ni. Nilaini khan, kar khat chhunga a vawi hnihna atan dodalna lantirtute chuan state building pawimawh an luhkhung leh a, Prime Minister office pawh an lungkhung tel.

Police-te chuan Parliament building chhehvel leh prime minister office-a Rajapaksa leh Wickremesinghe bang tura phuttute leh police-te inkara buaina chhuakah mi pakhat a thih bakah mi 84-in hliam an tuar thu an sawi.

Wickremesinghe chuan mipui pungkhawmte chu a office leh state building chhuahsan tur leh thuneitute nen ṭha taka thawkho turin a ngen.

Sri Lanka mipuite chuan Maldives rama tlanchhia, President Gotabaya Rajapaksa banna thehluh hun a la ngaichang mek. Rajapaksa hian Nilaini khan Parliament Speaker Mahinda yapa Abeywardena hnenah a ban ngei tur thu tiam mah se, nimin chawhma lam thleng khan banna lehkha hi a la thehlut lo.

Rajapaksa leh a nupui bakah bodyguard pahnihte chuan Nilaini zing lam khan Colombo bula international airport atangin air force thlawhtheihna hmangin an ram hi an chhuahsan a, Maldives ram an pan a ni. Maldives media-te chuan Singapore pana thlawk tur private jet an nghak mek tih nimin khan an sawi.

Sri Lanka Parliament chuan July 20 hian President thar tur hi a puan beisei a ni a, Wickremesinghe chu rorellai party hmatheh a ni mek a, thutlukna erawh siam a la ni lo. Eptu pawlte chuan president hlui Ranasinghe Premadasa-a fapa Sajith Premadasa chu President thar tur atan an chhawpchhuak thung.