Joe Biden-a'n Middle East a tlawh

US president Joe Biden chu President a nih hnua a vawi khatna atan Middle East a tlawh. Nilaini khan Tel Aviv, Israel a thleng.

Tel Aviv-a Ben Gurion airport-ah President Biden hi Israel official-te chuan an lo hmuak a ni. Biden chuan US leh Israel chuan inzawmna thuk tak an neih thu sawiin, "Zionist ni turin Jew nih kher a ngai lo," a ti. "Israel leh America mipui inzawmna hi thling thleng khawpa thuk a ni. A hma zawng aiin US leh Israel thawhdunna hi a thukin a chak zawk tih hi chhuang takin ka sawi a ni," a ti.

Biden chuan Israel leh Palestinian inhmuhthiam lohnate chingfel turin Jordan lui bulah, Israel state kianga State of Palestine pek, two-state solution a thlawp thu a sawi bawk.

Israel prime minister Yair Lapid chuan Biden chu Zionist ṭha tak niin a chhal a, Biden chu hriat phak china Israel ṭhianṭha berte zinga mi a ni, a ti. Biden hian Israel hi vawi 10 a tlawhna a ni a, a tlawh hmasak ber chu kum 1973, US Senator term khatna a chelh laiin a ni.

Biden hian Jerusalem-ah ni hnih chamin Israel hruaitute nen inkawmhona an nei dawn a, a hmuh turte zingah Lapid bakah prime minister hlui Benjamin Netanyahu pawh a tel. Vawiin hian West Bank-ah kalin Palestinian Authority (PA) president Mahmoud Abbas a hmu bawk ang.

Israel aṭangin Jeddah, Saudi Arabia lam pana thlawk lehin,Saudi official-te nen inbiakna neiin Gulf summit a hmanpui dawn a ni.