Nepal Parliament-in Citizenship Amendment Bill pawm

Nepal Parliament chuan Nilaini khan kum hnih chuang chhung political party te'na inremna an neih theih loh hnuah an rama Citizenship Amendment Bill hmasa ber chu an pawm ta.

He bill hi House of Representatives-ah kum 2020 aṭangin an lo sawiho tawh ṭhin a, mahse dan ruahman dan chungchang, a bikin rampawn aṭanga Nepali mipa pasala rawn neite tan khua leh tui nihna nei tura kum sarih chhung nghah ngai chungchangah political party-te an inlungrual thei ṭhin lo a ni.

Nilainia Parliament lower house, House of Representative meeting-ah home minister Bal Krishna Khand chuan Nepal-a Citizenship Amendment Bill 2022 hmasa ber hi pharhin, he bill hi ram danpuiin a phal anga khua leh tui nihna pek theihna tura Nepal Citizenship Act 2006 siamṭhat a nih thu a sawi.

"An nu leh pa Nepal mi ni si, mahse citizenship certificate pek theih loh mi tam tak an awm a ni. Citizenship certificate nei lo te hi zirna leh hamṭhatna an dawn tur kan chhuhsak a ni," tiin Home Minister chuan a sawi. Khand chuan bill thar hi Parliament-a Upper House, National Assembly-ah Ningani hian ngaihtuah ve leh a nih tur thu a sawi bawk.

Kar hmasa khan eptu pawl lianber CPN-UML lawmaker-ten an sawisel avangin Citizenship Bill hi House of Representative aṭangin sorkar chuan a hnukkir a ni.

Kum 2018 khan, khatih hunlaia KP Sharma Oli kaihhruai sorkar chuan bill hi Parliament Secretariat-ah an lo ziaklut tawh a ni.