Donald Trump-a'n Michael Flynn chhuina titawp turin Comey ngen

US President Donald Trump chuan FBI director aṭanga a ban tak, James Comey chu White House national security adviser hlui, Michael Flynn leh Russia-in inzawmna an neih leh neih loh chungchang a chhuina chu titawp turin a ngen nia sawi a ni.

Tunlaia US President chetdan hian sawi a hlawh hle a, engmah sawi lawk loin kar hmasa khan CBI director aṭangin Comey hi a ban a, a hnuah an ram tlawhtu Russia Foregin Minister Sergei Lavrov nena an inkawmnaah Islamic State firfiak pawl chungchanga thurukte a hrilh nia sawi a ni leh bawk.

Comey-a hnena a thil chhui lai President-in titawp tura a hrilh thu hi New York Times-in a tarlang a, FBI thil chhuinaa inrawlhah puh a ni. Mahse White House chuan he report hi a dik loh thu rang takin a chhuah zui thung. White House thuchhuah chuan,

'President hian Comey emaw, midang emaw hnenah pawh thil chhui lai titawp tura ngen a nei lo a, General Flynn chungchang pawh engmah a sawipui lo a ni' a ti.

White House official chuan acting FBI director, Andrew McCabe chuan kar hmasa pawh khan an thil chhui laia inrawlh tumna engmah a awm loh thu a sawi tawh niin a tarlang.

US House Committe chuan FBI hnenah, director hlui James Comey-a'n President Donald Trump chungchanga document a neih zawng zawngte pe turin a ngen. He ngenna hi Permanent Select Committe on Intelligence Chairman Republican Jason Chaffetz-a'n a sign a, FBI hnena thehlut an ngen zingah hian memoranda, note, summa leh recording pawh a tel. Heng document-te hi May 24-a pe turin a hriattir a ni.