Lula-a team-in UN-ah complaint thehlut dawn

Brazil President hlui Luiz Inacio Lula da Silva-a defence team chuan United Nations Committee on Human Rights-ah complaint thehluh an tum a, Lula-a chungthu ngaihtuahnaah politics a inrawlh nasa niin an sawi.

Kum 2016 July thla aṭang khan Lula-a ukil Cristiano Zanin Martins leh Roberto Teixeira-te chuan Operation Car Wash anti-corruption operation chungchang ngaihtuahtu judge, Sergio Moro chu Lula chungchangah thu lai la lo leh, a dikna chanvo neihte palzut sakah an puh a ni.

Nikum October thla khan UN chuan an thubuai hi lo enchian a remti a, mahse Lula chungchang bikah erawh engmah sawi a ni lo. UN-in a chhui dan hi confidential niin, kum hnih thlengte a awh thin. Lula ukil-te hian an ṭanchhan tihnghehna tur document chu Comittee on Human Rights hnenah hian an thehlut thar reng a ni.

Kar kalta khan Judge Moro chuan Lula hi thu a lo zawt tawh a, mahse Lula chuan an puhnate chu thu dik lo niin a sawi. Lula hi company hnena public contract pekna turah construction company OAS aṭangin thamna dollar maktaduai 1.15 hu laa puh a ni. Thubuai panga siamsak mek a ni a, heng a thubuai avang hian kum 2018 president thlan hunah chuh thei lo tura dan theih a ni dawn a ni.