NKorea-in UNSC thuchhuah pawm lo

North Korea chuan United Nations Security Council (UNSC)-in medium long-range ballistic missile a enchhin avanga demna thuchhuah a siam chu a pawm ve lo tih a sawi.

North Korea foreign ministry thupuangtu chuan UNSC thuchhuah chu an pawm loh thu sawiin, missile a enchhin chu an invenna tur atana ti a nih thu a sawi. "Mahni invenna chu ram tinin an ngaih pawimawh a ni. Hei vang hian min demna thu chhuah hi midang ram inrelbawlna chungchanga mawi lo taka inrawlhna a ni" a ti.

Pathianni khan NKorea hian ballistic missile a enchhin leh a, km 780 vela hlaa a target a fuh a ni.

United Nations chuan NKorea hi nuclear leh missile enchhin a lo khap sak tawh a, hetichunga a enchhin luih leh avang hian UNSC leh UN Secretary General António Guterres chuan an dem thu an sawi a ni. UNSC member ram 15-te chuan lungrual takin Korea demna thuchhuah hi an siam a, NKorea chu hrekna na zawk siamah an vau nghal bawk.